Лидерот на СДСМ, Зоран Заев, од гевгелиско, во среда порача дека не сака повеќе да се зборува за решавање на проблеми како загадена вода со арсен што во 21 век ги труе гевгеличани, тоа ќе се реши за шест месеци, туку за економија и перспективи.

„Овој гевгелиски регион пати од неколку болести, буквално којшто власта ги занемаруваше целиот овој период. Не може во 21 век еве 10 години од кога се појави проблемот со водата за пиење на гевгеличани, никој да не прави ништо. Арсенот и неговото присуство во водата за пиење се покажаа преку сите анализи на СЗО, сите анализи којшто покажаа покачување на малигните заболувања и други видови на заболувања, навистина во 21 век ова е недозволиво“, рече Заев.

Потсети дека иако власта избегнуваше да одговори и да признае дека има ваков проблем со изградбата на цевководот, водоводниот систем, резервоарот и слично, ги слушаме пред неколку дена конечно се фалат дека објавиле тендери да го изградат тој водоснабдителен систем за конечно граѓаните на Гевгелија, да добијат вода за пиење.

„Јас морам да им ветам на граѓаните дека вакви работи од аспект на вода за пиење, канализација, патна инфраструктура, или слично ќе бидат минато во Македонија. Со промената на власта нема да зборуваме повеќе за теми којшто живот значат за граѓаните како што е водата за пиење. Овој проблем ќе биде веднаш одлучен во првите шест месеци од новата Влада, распишани сите можни постапки и веднаш во најбрзо можно време ќе биде решен. Да зборуваме за економија, да зборуваме за перспективи, за повеќе пари кај граѓаните“, рече Заев.

На земјоделците им вети 160 милиони евра годишно субвенциите, или 640 милиони евра за 4 годишен мандат, но ќе бидат навремени, тогаш кога им требаат на земјоделците и ќе стигнат во рацете на вистинските земјоделци.

„Конечна цел мора да бидат парите да останат кај земјоделците, покрај целиот овој сет на мерки како што е укинувањето на персоналниот данок за земјоделството, воведувањето на зелената нафта којашто е 50% поевтина за користењето на земјоделските потреби и сите оние мерки кој значат подобрување на животот на село, овде од Богородица испраќам порака дека ќе создадеме амбиент, луѓето да останат и да живеат на село, односно ќе ја воведеме социјална пензија граѓаните со наполнети 65 години старост да добијат пензија без разлика дали имаат стаж работен или не“, рече Заев.

Смета дека целиот овој сет на мерки придружуван од инфраструктурата конечно мора да овозможи, рамномерен регионален развој во Република Македонија.