Со писмен допис испратен до Судскиот совет, Советот за утврдување на факти и покренување на постапка за утврдување на одговорност на судии, како и до Врховниот суд, вработени во Основниот суд Скопје 1-Скопје реагираат на однесувањето на претседателот на судот Владимир Панчевски.

Нарекувајќи го однесувањето на Панчевски монструозно, вработените бараат повеќе да не се „маша“ претседателот на судот кој „го узурпира судот за лични цели и пресметки“.

Тие потенцираат дека Владимир Панчевски, непосредно пред изборот на судски администратор, на безмалку 150 вработени им изрекол дисциплински мерки за непочитување на работното време, односно за доцнење од една до две минути.

Вработените се жалат дека Панчевски им врши класичен мобинг, односно дека им се забранува комуникација и движење низ судот. Тие бараат од Судскиот совет, од Советот за утврдување на факти и од Врховниот суд да извршат увид во нивните досиеја, на Панчевски да му биде изречена санкција и да биде преиспитана постапката за избор на судски администратор.